“Ti mbron çështjen time
Ti drejtëson gabimin tim
Ti thyen prangat e mia
Ti triumfon…”
Lauren është këngëtarja amerikane e muzikës bashkëkohore të krishterë,që në karrierën e saj rendit një sërë këngësh dhe çmimesh të suksesshme. Artistja e re më e mirë e vitit në 2015 GMA Dove Awards” është çmimi i parë në karrierën e saj. Albumi “Si mund të jetë”, është nominuar për një çmim Grammy, si albumi më i mirë bashkëkohor i krishterë. “How can it be” (Si ka mundësi) është kënga me e suksesshme e artistes, duke rrëmbyer shumë çmime por edhe duke u pëlqyer dhe nga shumë dëgjues. Producenti Paul Mabury kontaktoi me Lauren dhe i tregoj këngën të cilën ai e kishte realizuar me disa miq të tij.
Luren na tregon: Ndërkohë që dëgjoja këngën, fjalët morën jetë dhe lotët më rrodhën mbi fytyrë. Nuk e besoja dot që po reagoja në mënyrë të tillë ndaj kësaj kënge dhe Pol më tha: “Lauren, lejomë të të tregoj historinë… të të jap një tablo të kapitullit 8 të Ungjillit të Gjonit ku Jezusi po mësonte në tempull. Farisenjtë sollën një grua që kishte shkelur kurorën dhe i thanë: ‘Jezus, a duhet ta vrasim me gurë? Po ti çfarë do të bësh? Do ta vrasësh me gurë?’. Dhe Sipas ligjit, Ai supozohej ta vriste atë me gurë, mirëpo Jezusi bëri diçka që i la të gjithë pa fjalë. Ai derdhi hir mbi të”.
Kënga është një kryevepër, me një muzikë imponuese dhe një tekst hyjnor. Çmime të shumta por edhe vlerësime nga media të ndryshme i janë dhënë artistes për këtë këngë. “Si ka mundësi”, doli kënga më e mirë e vitit. CCM Magazin e ka vlerësuar me katër yje, Christian Review Magazine, Louder Than the Music, CMAddict dhe shumë të tjerë e kanë vlerësuar si një ndër këngët më të mira të muzikës së krishterë bashkëkohore, për vitin 2014, kur edhe kjo këngë u publikua. Kënga është pjesë e albumit me të njëjtin titull, ku ky album është vlerësuar me shumë çmime, nga producentë të ndryshëm dhe shtëpi diskografike .Kjo këngë ka rikthyer artisten shumë kohë mbrapa në jetën e saj, por për shumë njerëz kjo këngë është aktuale edhe sot. Lauren na rrëfen se si Perëndia ka punuar ne jetën e saj dhe e ka bekuar gjatë realizimit të kësaj kënge:
“Unë u kujtova për kohën kur meritoja më të keqen në jetën time dhe kur Perëndia më kishte çliruar plotësisht. Ai i lau duart e mia të ndotura dhe i bëri të pastra. Ai luftoi për mëkatin dhe turpin tim… mbrojti çështjen time dhe kjo këngë më përuli ndërkohë që e dëgjoja. Shpresoj t’ju pëlqejë dhe të përjetoni edhe ju shpengimin prej Tij, njësoj si unë. Kjo është kënga ime”- ka përfunduar Lauren.