Ka një ndërprerje domethënëse midis kupës së gjashtë dhe kupës së shtatë të gjykimit të Perëndisë tek Zbulesa 16. Në atë varg Zoti thekson një deklaratë të fuqishme. Ai thotë: “Ja, unë po vij si vjedhës; lum ai që rri zgjuar dhe ruan rrobat e veta që të mos ecë i zhveshur dhe të duket turpi i tij.” (Zbulesa 16:15).
E kam dëgjuar këtë varg të cituar si një paralajmërim për të qenë gati për kthimin e Zotit. Por unë mendoj se Zoti na e dha atë si një mesazh inkurajimi. Ky varg më bekon gjithmonë. Më thotë se edhe pse bota po zhytet kokë e këmbë në shthurje, mund t’i besoj Perëndisë. Mos t’ju lëshojë zemra; mos e humbni besimin. Zoti do të vijë si një vjedhës kur bota nuk do jetë duke e pritur.
Nëse fjalët “Unë po vij si vjedhës” ju tingëllojnë të dëgjuara, është sepse Jezusi u tha pothuajse të njëjtën gjë dishepujve të Tij:
Rrini zgjuar, pra, sepse nuk e dini në cilën orë do të vijë Zoti juaj.Por dijeni këtë, se ta dinte i zoti i shtëpisë në çfarë orë të natës do të vijë vjedhësi, do të rrinte zgjuar dhe nuk do të lejonte t’i shpërthehej shtëpia. Prandaj edhe ju jini gati, sepse Biri i njeriut do të vijë në atë orë kur ju nuk mendoni.” (Mateu 24:42–44)
Apostulli Pal përdori të njëjtën metaforë: “[Ju] vetë e dini shumë mirë se dita e Zotit do të vijë, si një vjedhës natën.” (1 Thesalonikasve 5:2). Edhe apostulli Pjetër përdori të njëjtën metaforë: “Dhe dita e Zotit do të vijë si një vjedhës natën; atë ditë qiejt do të shkojnë me krismë, elementët do të shkrihen nga të nxehtit dhe veprat dhe toka që janë në të do të digjen krejt” (2 Pjetrit 3:10). Ndaj duhet t’i kushtojmë rëndësi çdo fjale që Perëndia na thotë – por kur Ai bën të njëjtën deklaratë katër herë në Fjalën e Tij, atëherë bëjmë mirë ta marrim parasysh.
Dita e Zotit do të vijë si një vjedhës për ata që janë në gjumë shpirtërisht, por për ne që jemi vigjilentë e dimë se do të jetë një ditë e mrekullueshme.
Lutje: Zot, kur të ndihem sikur po më merret fryma nga shqetësimet e kësaj bote dhe nga mendimet për të duruar vuajtjet dhe persekutimet, më jep një vizion të përjetshëm të dashurisë dhe qëllimit Tënd. Më ndihmo të besoj te Ti dhe të gjej paqe në hirin tënd shpëtues dhe në Mbretërinë e ardhshme. Në emër të Jezusit, lutem. Amen.
“Rrini zgjuar, pra, sepse nuk e dini në cilën orë do të vijë Zoti juaj.” (Mateu 24:42).