Krishti është i njëjtë dje, sot e përjetë.– Hebrenjve 13:8

Filozofi grek Herakliti ka thënë: “E vetmja konstante në jetë është ndryshimi,” dhe kush mund të argumentojë me këtë?

Kur isha vajzë e vogël, gjyshi drejtonte një kishë të madhe, të cilën e shihja si diçka tepër madhështore. Kisha, kishte dritare me xhama të pikturuara, një ballkon të madh dhe një papafingo me një kor të madh dhe grupin muzikor, të gjitha të mbuluara nga një tavan shumë i lartë, i lyer me ngjyrë blu të hapur, dhe me re të bardha të mëndafshta. Por ajo që më bënte më shumë përshtypje mua ishte shkrimi mbi pikturën që thoshte: ” Krishti është i njëjtë dje, sot e përjetë.” Hebrenjve 13:8.” Që nga ajo kohë, jeta ime ka ndryshuar shumë dhe vazhdon të ndryshojë me një ritëm gjithnjë e më të shpejtë, por kjo e vërtetë qëndron më fort se kurrë: jeta ndryshon, por Perëndia jo.

Në Psalmet thuhet: “Por ti je gjithnjë po ai dhe vitet e tua nuk do të kenë kurrë fund.” (Psalmi 102:27). Nuk ka datë skadence për fuqinë e Perëndisë apo dashurinë e Tij që nuk shteron kurrë dhe ftesën e tij për të shkuar tek Ai për falje, shërim dhe jetë. Nëse jeni ndjekës i Jezusit, themeli i jetës suaj është natyra e pandryshueshme e Perëndisë dhe premtimi i pranisë së Tij.

Kur dhimbja na shkatërron jetën, kemi tendencën të largohemi prej Tij, duke menduar se Ai është mosdashës dhe jobesnik. Por Ai i ka shkruar historitë tona që nga fillimi deri në fund – ndaj kurrë mos mendoni se Ai ka ndryshuar qëndrim ndaj jush dhe nuk kujdeset për ju.

Në librin e fundit të Biblës thuhet: ” hir për ju dhe paqe nga ana e atij që është dhe që ishte dhe që do të vijë.” (Zbulesa 1:4). Edhe në mes të stuhive të jetës dhe të trazirave të kohëve ku jetojmë, mund të kemi paqe dhe të ndjejmë siguri nëse  kujtojmë natyrën e pandryshueshme të Perëndisë.