Mel Gibson u ka bërë thirrje kishave të luten për të dhe ekipin e tij, ndërsa përgatitet të sjellë në ekran historinë e ringjalljes së Jezus Krishtit.
Filmi i tij i shumëpritur, “The Resurrection of the Christ Part One” (Ringjallja e Krishtit – Pjesa e Parë), pritet të shfaqet në kinema më 6 maj 2027.
Në një videomesazh drejtuar pastorit Samuel Rodriguez dhe anëtarëve të Konferencës Kombëtare të Udhëheqjes së Krishterë Hispanike, Gibson shprehu mirënjohjen për mbështetjen dhe lutjet e besimtarëve.
“Ju lutem, përgatitni kishat tuaja që të luten për ne, ndërsa bëhemi gati për ta sjellë filmin në kinema majin e ardhshëm. Ju falënderoj për të gjitha lutjet dhe mbështetjen tuaj. Zoti ju bekoftë”, u shpreh ai.
Gibson zbuloi gjithashtu se pastori Samuel Rodriguez e kishte vizituar gjatë xhirimeve në Itali, ku pa nga afër përmasat e projektit. Videomesazhi përfshinte edhe vlerësime për ndikimin shpirtëror të filmit. Kardinali Gerhard Ludwig Müller u shpreh se Gibson po “predikon Ungjillin përmes këtij mjeti modern”.
Ndërsa Franklin Graham theksoi rëndësinë historike të ngjarjes që filmi sjell në ekran. “Ky nuk është thjesht një film. Kjo është ngjarja më e madhe në histori dhe ajo po rikrijohet këtu, që ju të mund ta shihni”, tha Graham, duke shprehur shpresën se filmi do të prekë jetët e miliona njerëzve.
Më shumë se dy dekada pas filmit “The Passion of the Christ” (Pasioni i Krishtit), i cili paraqiti vuajtjet dhe kryqëzimin e Jezusit, Gibson po përgatitet të tregojë atë që ndodhi më pas.
Ringjallja është në qendër të besimit të krishterë, sepse përfaqëson fitoren e Krishtit mbi vdekjen dhe themelin e shpresës për jetën e përjetshme.
Përmes këtij projekti, Gibson synon të sjellë te një audiencë e gjerë mesazhin e një prej ngjarjeve më të rëndësishme të Biblës. Ndërsa përgatitjet vazhdojnë, thirrja e tij drejtuar kishave është që ta mbështesin filmin me lutje.
Filmi pritet të dalë në kinema më 6 maj 2027.
