Matthew West ndan historinë personale pas këngës “Good”

Matthew West ka arritur këtë javë të pozicionohet në vendin e parë në klasifikimet e radios me këngën e tij më të re, Good (I Mirë). Kjo shënon këngën e tij të 39-të që arrin vendin e parë si artist dhe autor këngësh, duke forcuar edhe më shumë reputacionin e tij si “një nga autorët më produktiv të muzikës së krishterë,” siç e ka përshkruar Billboard.

I njohur për këngë si Forgiveness, Do Something dhe Truth Be Told, ai vazhdon të ndajë histori të sinqerta të besimit dhe betejave personale. Kjo është një nga këngët e tij më personale të publikuara deri më sot.

Ai thotë: “Good” flet për udhëtimin tim të gjatë për të kuptuar hirin e Perëndisë. Si fëmijë i një predikuesi, e pranoj se jam ndjerë nën shumë presion për të qenë “i mirë” teksa rritesha. Si i rritur, ky presion ka vazhduar në një nivel tjetër si këngëtar dhe autor këngësh. Në përpjekjen time për të bërë gjithçka siç duhet dhe për t’iu bindur çdo rregulli, herë pas here e gjej veten duke dështuar.

Kam kaluar jetën time duke e trajtuar hirin si një shkallë që duhej ta ngjisja, sikur, nëse bëja mjaftueshëm gjëra të mira, atëherë do të isha i denjë për dashurinë e Perëndisë. Por Ai vazhdon të më tregojë se hiri nuk është një shpërblim apo diçka që duhet ta fitoj; është një dhuratë e dhënë falas. Kjo e vërtetë e fuqishme jo vetëm që frymëzoi këtë këngë, por ka ndryshuar jetën time.

“Good” flet për heqjen dorë nga presioni për të qenë perfekt dhe përqafimin e hirit të pakushtëzuar të Perëndisë. Duke pasur parasysh betejën time të vazhdueshme për të mos e trajtuar hirin si një shpërblim që duhet fituar, shpresoj që kjo këngë t’u kujtojë dëgjuesve se ata janë të dashur sepse Perëndia është i mirë, jo për shkak të mirësisë së tyre.

Kënga është krijuar për të inkurajuar këdo që ndihet se nuk është “mjaftueshëm i mirë,” duke i kujtuar se hiri i Perëndisë është i mjaftueshëm dhe ka fuqi të transformojë jetën. Në këngë, vargjet “Unë nuk jam i dashur sepse jam i denjë, jam i dashur sepse Ai është i mirë” janë një kujtesë e Ungjillit për të gjithë ne.